Psa 57 | YomNWM | STEP | Nkunga Davidi kuidi pfumu minyimbidi “kadi vonda.” Mu thangu kasuamina mu nluka matadi Sawuli bu kaba kunkuka. Wumboni kiadi, a Nzambi, wumboni kiadi ! Bila muelꞌama wunsuaminanga mu ngeyo ndiela suamina ku kitsusula ki mavavi maku, nate mabienga mela mana vioka.

Psalms 57

Ndidi mu ndembama va khatitsika bambeni

Nkunga Davidi kuidi pfumu minyimbidi “kadi vonda.” Mu thangu kasuamina mu nluka matadi Sawuli bu kaba kunkuka.

1 Wumboni kiadi, a Nzambi,
wumboni kiadi !
Bila muelꞌama wunsuaminanga mu ngeyo
ndiela suamina ku kitsusula ki mavavi maku,
nate mabienga mela mana vioka.
2 Ndiela yamikina kuidi Nzambi yizangama ;
kuidi Nzambi weti dukisa zikhanu ziandi kuidi minu.
3 Weti fidisa tona ku diyilu ayi weti kuphukisa ;
mu temina bobo beti kundandakana mu kingolo ;
Nzambi weti fidisa luzolo luandi
ayi kikhuikizi kiandi.
4 Ndidi va khatitsika zikhosi ;
ndidi wulambalala va khatitsika bibulu bindianga minsuni ;
batu bobo meno mawu madi banga madionga mafioti ayi maneni
ludimi luawu luidi sabala yisekoso ngolo.
5 Yayusu kuaku, a Nzambi, ku yilu diyilu
Bika nkembo aku wuba va ntoto wumvimba !
6 Batambila malu mama dikondi.
Ndiba wukomvama mu ziphasi ;
Bakaba dibulu dinnene mu nsolo ama :
vayi bawu veka ba buidi muawu.
7 Ntimꞌama widi wukinda a Nzambi ;
ntimꞌama widi wukinda.
Ndiela yimbila, ndiela bula miziki.
8 Kotuka, muelꞌama !
Kotukanu, ngeyo Luti ayi ngitala
ndiela kotula khiesa ki lumbu.
9 Ndiela kuzitisa, a Yave, va khatitsika makanda.
Ndiela kuyimbidila va khatitsika batu.
10 Bila luzolo luaku luidi lunneni, luntulanga nate kuna diyilu,
kikhuikizi kiaku kintulanga nate ku matuti.
11 Yayusu kuaku, a Nzambi, ku yilu Diyilu.
Bika nkemboꞌaku wuba va ntoto wumvimba !